السبت، 10 ديسمبر 2011

نكت بايخة جدا جدا جدا


مرة واحد جى يشكل وزارة اتشكل عليه و لقاها منتهية الصلاحية
                                               _____________

مرة واحد شحات سقط فى الانتخابات
                                           __________________


مرة واحد كان بكار صدق و افتكر نفسه امير الشطار
                  
                                ________________________


واحد اخرس راح يصوت صوتوله

                                      _____________________


مرة واحد بتاع ربنا اتهم واحد بتاع ربنا بالكذب و التزوير
ام بتاع ربنا التانى اتهم بتاع ربنا الاولانانى بالكذب و التزوير
ام الناس احتارت فى البتوع
 
                                           ____________________


مرة واحد صبحى الصبح  لقى نفسه صالح مصدقش نفسه راح مرشح نفسه فى الانتخابات و نجح  

                                         ______________________


مرة واحد عامل نفسه بيفهم فى كل حاجة بيفتى و يقول فى كل حاجة ادب تلاقيه نجيب سياحة ماشى دين مفيش مانع تاريخ علامة كبير تفتح التلفزيون تلاقيه تفتح البوتجاز ماشى الثلاجة محفوظ فى الفريزر تحت الطلب من ساعة ما خد على قفاه فى اسكندرية من حبايبه الحلوين و هو مبقاش يظهر بوشه السمح بقى يظهر من وراء ستارة 

                                  ______________________


مرة واحد ملازم فينا
اصله كان ملازم اول يقعد معانا
قاله  نقيب واحد يحكم فينا
هو كان مقدم على دستور طلع اعلان دستورى
عشان كان رائد فى الحكم
و منهجه هو تعقيد الامور
اصله كان فاكر الشعب عميد   فى نظره
و لما الشعب فهم و ثار قام لوا بوزه
قالهم انا فريق وانتم فريق
راح مشير عليهم باستفتاء و جنزرهم
و مسك فانوس و ضحك بيه على الشعب مع ان رمضان فات
و قالهم كل حاجة عندى بميزان
البلد على وشك الانهيار و مديونة و سلفيين من طوب الارض
فلازم نبقى اخوان مع بعض و نقعد ساكتين
فالشعب سكت بس خلاص  
                                         بلد مجانيين صحيح
     
   

هناك 21 تعليقًا:

دعاء العطار يقول...

صباح الخيييير

" فالشعب سكت بس خلاص "

اهى دى المشكله ... هو احنا لسه محتاجين نحكى حكاية الثعلب المكار مش للاطفال لاءه لينا وللى اكبر مننا عشان يفهموا اللعبه

عجبنى اوى اسلوبك فى وضع الاسماء بين السطور بجد مبدع :)

Finalway يقول...

المصريين بس هم الي رح يفهوا هاي النكت
:(

اجدع ناس

AhMeD RaDy يقول...

هى بايخة لدرجة تحزن بجد

وربنا يسترها

لانها قلبت غم خالص بجد

د/دودى يقول...

عارف النكت مش هى اللى بايخه...ابطالها هى اللى بايييخيييين و الابوخ من البواخه اللى هى بايخه انهم مش عارفيين مدى بواخه بواختهم

faroukfahmy يقول...

نكتك ياابراهيم نكتت عليا على الآخر
وسيبى اعلق على كل واحده اوعى تمسكنى براحتى
-مره واحد كانوا هيختاروه وزير ..زور مات من الجنزره
-شحات شحت صوت طرش
- بكار صحى وخرى عشان ينتخب افتكروه عشان دايما بكار لسه نايم
-الاخرس من كتر الزعيق فى الانتخابات سمع خروشه
-اصل البتاع باع صوته بلاليم زهيده
-عشان كده تليفزيزنى دايما بيبوظو التلاجه عاوزه تتصلح
الفاروق

بسمة الورد عطر المشاعر يقول...

صباح السخرية الجميله من قلمك ابراهيم

يروق لى دايما تشغيل دماغى مع الغازك هههههه

لكنى بعترف ساعات دماغى بتهنج منى ومش بتفهم خالص وبيبقى احسن ساعتها علشان مش تتعب

كل التحايا والتقدير لما تقدم

ليلى الصباحى.. lolocat يقول...

السلام عليكم
يقولوا شر البلية مايضحك

الشعب المصرى معروف من زمن قديم انه بيقدر يحول المصيبة لنكتة علشان يقدر يواصل حياته

يمكن كنا بنقدر نكتم غيظنا و مشاعرنا ضد القهر والظلم والافتراء قبل كده


لكن
(((فالشعب سكت بس خلاص )))

ما افتكرش ابدا ان الشعب المصرى هيقدر يسكت تانى او على الاقل يمكن يسكت وقت قليل لكن مش هيدوم سكاته كتير زى زمان ابدا ابدا
خلاص فاض بينا وماعاد عندنا قدرة للصمت تانى

يمكن الشعب مستنى ومنتظر تعدى الازمات دى لكن سكات تانى على طووووووووول ....لااظن ابدا


والله لو سكتنا تانى نبقى فعلا بلد مجانين :)

تحياتى وتقديرى لك

لــــ زهــــــراء ــــولا يقول...

_____________________


مرة واحد بتاع ربنا اتهم واحد بتاع ربنا بالكذب و التزوير
ام بتاع ربنا التانى اتهم بتاع ربنا الاولانانى بالكذب و التزوير
ام الناس احتارت فى البتوع

____________________

هههههههههههههههههههههههه قوم ايه الناس احتارت في البتوع (:




مرة واحد ملازم فينا
اصله كان ملازم اول يقعد معانا
قاله نقيب واحد يحكم فينا
هو كان مقدم على دستور طلع اعلان دستورى
عشان كان رائد فى الحكم
اصله كان فاكر الشعب عميد فى نظره
و لما الشعب فهم و ثار قام لوا بوزه
قالهم انا فريق وانتم فريق
راح مشير عليهم باستفتاء و جنزرهم
و مسك فانوس و ضحك بيه على الشعب مع ان رمضان فات
و قالهم كل حاجة عندى بميزان
البلد على وشك الانهيار و مديونة و سلفيين من طوب الارض
فلازم نبقى اخوان مع بعض و نقعد ساكتين
فالشعب سكت بس خلاص
>>>>>>>>>>>>>>>>>>>>>>>>>>>>>>>>>>>

ماشي يا ابو زياد وساليناز حلوة قوووي ومش هتناقر معاك المرة دي (:
بس خلي بالك شكل شهر العسل بين المشير والاخوان هينتهي
( دا على اساس ان المجلس هوه اللي نجح الاخوان في المرحلحة الاولى مش الشعب (:)

اسلوبك رااااااااااائع

لولا

نسرين شرباتي "أم سما" يقول...

نكت اخر حاجة

Tarkieb يقول...

هههههه دايما منكت علينا كدة؟ حلويين بس نسيت المقدم بعد الرائد.....

عمرو يسرى يقول...

ملك السخريه
تحياتى

;كارولين فاروق يقول...

نكت دي يا مرسي؟؟؟

nour alqamar يقول...

شكرا لك ... تحياتى
نور

آرثـر رامبـو يقول...

يا خطيـر !

Unknown يقول...

مؤلمة لكن مش بايخة

هبة فاروق يقول...

نكت جامده جداااا
وفى الصميم

افكار مبعثرة يقول...

انت ختمتها صح
(فالشعب سكت بس خلاص)
فعلا شر البلية ما يضحك
تحياتي لسخريتك التي تبكينا من كثرة الضحك و تضحكنا من كثرة البكاء
:)

Emtiaz Zourob يقول...

طيب كويس انه الشعب سكت في النهاية .. لكن هي دي نكت بجد ؟؟

ربنا يصلح الاحوال يارب .

مها البنا يقول...

مرة واحد بتاع ربنا اتهم واحد بتاع ربنا بالكذب و التزوير
ام بتاع ربنا التانى اتهم بتاع ربنا الاولانانى بالكذب و التزوير
ام الناس احتارت فى البتوع


شر البلية ما يضحك

zizi يقول...

معلش انا لقيت دي كمان فاتتني ايام العيا قلت لازم اعلق عليها ..حاجة حلوة قوي يا ابراهيم ..ومتضبطة ..الله يفتح عليك ..

heba atteya youssef يقول...

اكثر من رائعة .. روعتها بلغت حد الوجع

دمت بارعاً .. تحياتي