الثلاثاء، 13 ديسمبر 2011

طفى النور يا بهية

هذه بعض تخاريفى ليس لها اى معنى و لكنها تخاريف و خلاص

طفى النور يا بهية
دولا شوية حرامية
ركبوا الموجة الثورية
بيدوسوا عالحرية
و عدالتهم مهرية

طفى النور يا ام صلاح
دولا باعوا الكفاح
كل العيشة سفاح فى سفاح
شرب الدم عشان يرتاح

طفى النور يا ام امين
دولا شلة منتفعين
شوفى ولادك شالوا الطين
و بيزرعوا كل البساتين

طفى النور يا ام نجيب
دولا بتوع الاكاذيب
سيبك من كل التغريب
انتى ولادك الف اديب



طفى النور يا ام النور
دولا غربان داير ما يدور
لجل ما يجى عليكى الدور
تبقى العيشة موت فى قبور


طفى النور يا ام جمال
دولا ربطوكى بالاغلال
خلوا الحمل يهد جبال
بيهدوكى بالاستغلال


طفى النور يا ام العز
مهما يهزوا فى بيتك هز
و مهما ولادك ياخدوا الغز
بيتك هو بيت العز

بينى نورك يا صبية
علشان تيجى الحرية
فداها عيونهم و عنيا
مش هيبيعوا القضية

هناك 18 تعليقًا:

reemaas يقول...

اول مرة اشوف تخاريف عاقله

دولا اللى بتتكلم عنهم حسانى نفسى اشاور عليهم انا كمان

amiraali يقول...

هههههههههههههههههههههههههههههههههههههههه
حلووووووه اوووي

دعاء العطار يقول...

اهم حاجه ان مصر فيها ناس ابدا مش هتبيع القضيه

وهو ده اللى يطمن مهما طال الظلم

جميله الكلمات ومش حاساها تخاريف خالص بل واقع

دمت بخير

مصطفى سيف الدين يقول...

آفة كل ثورة هو وجود فئة متسلقة تبحث عن مطامعها الشخصية دوما
آفة كل ثورة ان كل ثائر ينسبها لنفسه ويطمع في مكتسباتها لنفسه
الكل يتناسى الوطن ولا يتذكر الا المقعد
وطفي النور يا بهية
علشان الصورة توضح ليا
نورك خدع العيون السكارى
طمعوا فيكي واكلك الحرامية

تحياتي يا هيما

ظلالي البيضاء يقول...

دمت بخير أستاذ إبراهيم ..
أحببت أن أسجل سلامي لك ..

غير معرف يقول...

طفى النور يا ام امين
دولا شلة منتفعين
شوفى ولادك شالوا الطين
و بيزرعوا كل البساتين

؛؛
؛
صباح الغاردينيا أستاذ ابراهيم
لاأعتقد أنها مجرد تخاريف
بل هي سطور حملت معنى خفي
وكلمات لها عمق وإن توشحت بعض ألم
رائع دائماً "
؛؛
؛
لروحك عبق الغاردينيا
كانت هنا
reemaas

ليلى الصباحى.. lolocat يقول...

السلام عليكم
نسأل الله تعالى السلامة لبهية وعيونها واولادها
ويارب يكون الهادى نور الله ونور الايمان الخالص والعمل الصالح والنية الصافية

تحياتى لك اخى ابراهيم
دمت بأمان الله

faroukfahmy يقول...

بهيه- ام صلاح-ام امين-ام نجيب -ام النور -ام جمال -ام العز
ايه ياهيمة كلهن امهات مفيش صبيه حلوة وانا اكمل وراك انت تعبت من كتر الكلام ياريت ييجى بفايده ويبقى حسن الختام القليل الباقى يبقى نمــــــام
احلفك يا ابراهيم سلملى على الترماى ابو سنجه ياريت يروح التحرير وانا اروح تانى معاك ونشوف روح قلب ماما وحشتنى قوى والعيال بناتى بيسألن عليها

هبة فاروق يقول...

تخاريف ايييييييه
ده هو ده عين العقل ..كل جمله كتبتها حكايه وكل حكايه بتحكى عن مصير اولاد بهيه ..اولادك يا مصر
ابدعت جداااا فى رسم احوال مصر وشعبها بأتقان فى هذه الفتره العصيبه
تحياتى لقلمك الحساس النابض بحب مصر

افكار مبعثرة يقول...

"و مهما ولادك ياخدوا الغز
بيتك هو بيت العز"
جامده جداااااااااااااااااا
و ليست تخاريف
ليست تخاريف
ليست تخاريف
تلات مرات عشان التوكيد :)
تحياتي لابداعك

نسرين شرباتي "أم سما" يقول...

بكرة النور ينور
وكل هاي الأشياء إن شاء الله بتروح
ما بعرف شو بدي أحكي
هي مرت سنة
يا ترى حال البلد أحسن ولا أسوأ؟
بيتهيألي نحو التحسن إن شاء الله
مشوار الألف ميل لازم يبدأ بطريق

أمل م.أ يقول...

طفى النور يا ام النور
دولا غربان داير ما يدور
لجل ما يجى عليكى الدور
تبقى العيشة موت فى قبور

ههههه صدقا من اجمل ما قرات
كلمات لاذعة ..اقصد رائعة
تصف بصدق مشاعرك انت اولا
وتصف مشاعر كل انسان صادق مع نفسه
وبحب بلده من كل قلبه
والله كل الاحترام بجد جميلة
ربي يوفق الشقيقة مصر ام الدنيا
وتعدي لبر الامان قريبا يا رب
لك مني كل الود والتقدير

كن بخير دوما

;كارولين فاروق يقول...

ههههههههههه
وضحت فكرتك جيدا بطريقه لطيفه
شعبيه عميقه ترسم البسمه
وطنيتك واضحه
وحبك لمصر ايضا
تحياتي

دعاء يقول...

كل مجموعة تعبر عن شيء معين ...
مقتطفات رائعة من تخاريف أصبحت حقيقة ...

تحيآتي لكْ ...

لــــ زهــــــراء ــــولا يقول...

كل الاحزاب هتموت
وهتعيش مصر الى ان يشاء الله
ايدي النور يامصر
فداكِ ولادك يا مصر
انتِ ام كل عصر
واملي مش فيهم فيكِ انتِ يا مصر


لولا

شمس النهار يقول...

طفي النور طفي النور
انت ليه عايز تعمل مشاكل مع حزب النور
:))

د/دودى يقول...

مش هنبيع القضيه عشان معندناش غيرها ...والا هنموت ناقصين عمر

zizi يقول...

انت عارف يا ابراهيم انا الصعبان عليا في المولد دا كله الثوار الحقيقيين دول اللي تعبوا قدموا كتير للبلد وبعد كده شفطوها منهم ..وبجد بجد لو الناس دول ما اتحطش منهم شوية بالتعيين في المجلس الموقر تبقى بلد عايزة الحرق وياريت فعلاً يختاروا كام واحد من اللي راحلهم عين والا رجل والا إيد حايبقوا كدا عداهم العيب ..بس انت قلبت والا ايه ..عموماً كله منك حلو يابو زياد ..تحياتي