الاثنين، 19 ديسمبر 2011

مجرد رقم + تحديث

                            تحديث
صرح الشيخ ؟؟؟؟ ياسر البرهامى ان الفتاة المنتقبة التى انتهكت ليست منتمية للدعوة السلفية و انها لبست النقاب لكى تورطهم و دعنى اسأل بعض الاسئلة 
   
1  هل عدم انتمائها للدعوة السلفية يعنى انها غير مسلمة
2  اذا كانت منتمية للسلفيين ما هو التصرف الذى كنت ستتصرفه
3  اذا كانت غير مسلمة اصلا هل هذا مبرر لانتهاكها
4  كيف تستطيع ان تورط السلفيين هل هى من طلبت ان يعروها
5  ما هو التورط الذى يقصده الشيخ
    هل هو قول الحق
    ام تعطيل الانتخابات
    ام الدخول فى صدام مع حبايبهم الحلوين المجلس العسكرى

يبقى شىء يحيرنا ما هو شكل المنتقبة المنتمية لهم هل موضوع عليها لوحة تحمل صورة وردة ملاكى حزب النور
و لا حول و لا قوة الا بالله




مازلت اخرف و اخرف و اخرف و اخرف


واحد اتنين تلاتة ارقام
شد لحافك روح نام
سيبك خليك فى الاحلام
ما اهى ارقام يعنى اوهام


واحد يعنى شيخ ثائر حامد
بيقول اصحى افضل صامد
يعنى مخرب و راجل فاسد
اضربه طلقه و خليك جامد

اتنين يعنى علاء لبلدنا
بيقول بكره و حلم ولادنا
يعنى مخرب سارق زادنا
اضربه طلقه  مين يعاندنا


اما تلاتة فده منصور
شايل حلمه وعدى بحور
يعنى دسيس خاين موتور
اضربه طلقه وفض الدور

الف لسيد سيد الكل
قلب صغير زى الفل
قول متشرد يبقى الحل
اضربه طلقة و فش الغل


رقم يعنى حزن فى ليل
دمعة طفل يتيم بتسيل
حرقة ام لابن جميل
بحر حزن و قلب عليل


واحد اتنين تلاتة لمية
حول يالا على اغنية
ناقصين هم و مسئولية
خلونا ننسى الهم شوية

عد معايا الى  الف و الف

عمرك ما تبص على الخلف
مات جربوع  و عليه يتف
انتوا فى حلف و احنا فى حلف


يا اخوان بصوا على النور
صناديق لولى و بدر بدور
و صناديق برده رايحه قبور
فكروا مين اللى  عليه الدور 

ازاز لب و شوف النشرة
علشان تعرف اخر بشرة
و اسمع فيها فشر الفشرة


بيادات داست على كذا حشرة

غمض عينك بعديها نام
يالله ابتسم نام فى سلام
ليلة جميلة من الاحلام
ما اهو رقم من الارقام



هناك 22 تعليقًا:

Emtiaz Zourob يقول...

لم ولن يكون رقم من الارقام ..

كتبت ذات مرة قصة قصيرة بعنوان " أحلام متناثرة " وقصة أخرى بعنوان " كانوا ثلاثة " وفيهم تناولت قصة الأرقام .. نحن في نشرات الاخبار مجرد أرقام ولكن في حياة أهلنا وأحباؤنا فنحن بشر نتنفس ونعيش نحب ونكره نسعد ونشقى .. لنا أحلامنا وطموحاتنا .. لنا حياتنا ..

ربنا يرحم جميع الشهداء ويصبر ذويهم يارب ..

كلماتك جاءت على الجرح تماما ..

zizi يقول...

ربنا يظهر الحق ويشيل الغمة دي عن مصر ..فلا أظن ان احداً مخلص لمصر يريد لها ذلك وسوف تظهر الأيام الأيادي الخفية وراء كل ذلك ..تحياتي وامتناني لقلمك المبدع ..

عازفة الالحان يقول...

مسآأئك مُتورد
مسآأئك دآأفئ أخي

حُروفْ ذآت شُعور فَيآضْ
ذآتْ أحلآمْ وآأسعَة

مآ أرقهآ وآجملهآ

شُكرآ لحرفك

دعاء العطار يقول...

مش عارفه اقولك ايه يااستاذ ابراهيم ولا بقيت عارفه اتكلم اصلا .. اول مره احس ان الحزن عندى اكبر من اى كلام يتقال

اللى حصل المره دى غير اى مره .. اللى بيحصل المره دى بيحسسنا قد ايه لااحنا تافهين وصغيرين اوى فى نظرهم ولا نسوى اى حاجه

بعد ماكنا بدانا نحس ان المصرى بقى له كرامته

بقيت احس بكسر من جوايا من اللى شوفته واللى بشوفه

هنقول ايه غير حسبى الله ونعم الوكيل

كلامك مش تخاريف كلامك كله حسرة وقهر على بلد بتقع قدام عنينا ومش قادرين نعمل حاجه

مصطفى سيف الدين يقول...

صحيح مجرد رقم بيتنسي
ماحنا دايما بننسى
ربنا ييسر الحال ويعديها

faroukfahmy يقول...

اياك بقى يا ابراهيم التعليق ده يظهر
حروفك يا ابراهيم ذات شعور وليست من الشعير اللى كتر الايام دى
تسلم ايدك ياحبيبى تعبت من اول المشوار وده أخر الكلام والفصال
آخرتها يا ابراهيم تيت تيت خلص الشريط يا معلم
اهو كل اللى بيقلوه كلام فى كلام واحنا بتغنى وراهم ظلموكى يامصر يا ام الغلمان

شمس النهار يقول...

مالك ياابراهيم

صدقني رغم السواد انا متفائلة وجداااااااااااااا

nour alqamar يقول...

ربنا يحمى مصر يارب ,,
تحياتى لك
نور

رؤى عليوة يقول...

حزينه أو وخايفه عليها

حزينه أوى ومش كلمه كتير قلتها

خايفه ومبقتش عارفه مين ممكن يكون مصدر أمان ليها ولينا

يمكن ربنا وحده العالم بالحال والقادر على تغييره فى لحظه

بس امتى اللحظه دى ؟؟؟

حروفك مؤلمه أستاذ إبراهيم ... يمكن حروفنا كلنا مليانه ألم وحزن

شغلتنا مصر حتى عن نفسنا ... هو إحنا بنحبها أوى كده ليه ؟؟ رغم اللى نفتكره لها مش جميل ولا اللى عشناه فيها كان حلو بس ... فيها حاجة غريبه منقدرش نداريها


تحياتى

reemaas يقول...

عارف يا استاذ ابراهيم انا بقالى يومين بدخل نفسى اكتب كلمة واحدة بس مش عارفه اجمع

نفسى اعلق عند حد ومش عارفة ارد

عارف لما تحس ان قوتك مسحوبة منك


كلام زود احساسى ده وعبر عن اللى جوايا اوى

غير معرف يقول...

صباح الغاردينيا أستاذ ابراهيم
وحرفك دائماً هو الصوت الاول الذي يصرخ في وجه الكثير ويجيد رم الإبتسامة للكثير حين تنتقد وحين تسخر وحين تضحك لكل حرف هنا مغزى خاص يدركه متذوقي ابراهيم رزق "
؛؛
؛
لروحك عبق الغاردينيا
كانت هنا
reemaas

حَنيّـن نِضال يقول...

قديكونو رقم في نشره الاخبار العابره قبل مسلسل المساء و قد يصبحون سطرا في كتب التاريخ دون الاشاره الى اسمائهم و قبرا بين القبور كتب عليه شهيد لن يقف امامه احد ليقرأ على ارواحهم الفاتحه غير الثكالى لكن عند الله مكانتهم عاليه احياء يرزقون . . اصطفاهم دون سواهم ليريحهم من نكد الدنيا و كدها . . لانه يعلم بحالهم و مألهم

مع اني اعتقد انهم بكلماتك عاشو و لم يعودوا رقم !

هبة فاروق يقول...

واحد اثنين ثلاثه
مصر بقت اخر شرباتاته..شبه الملبن والشيكولاته
شىء يحزن ويجيب الاكتئاب ..ايه الفوضى دى وايه السحل والتعذيب والضرب ده ..احنا فين ..وحنبقى فين ..ورايحين على فين
تحياتى ..كلمات صادقه وصادره من القلب

AhMeD RaDy يقول...

استاذ/ ابراهيم

مش عارف ايه الرد المناسب لما سطرته والاجابات التى تليق بالاستفهام المنطقى جدا وبشدة !!

احتار مثلك تماما .. واتسائل ! قالوا النقاب لبست نقاب . قالوا متعرية طلعبت لابسة بلوفر ازرق .. قالوا قليلة الادب نزلت .. قولنا ارجل من اللى جابوا اهل اللى سأل !!

ايه تانى مسلمة ... طز

اتعرت ... طز

اهانة شعب ... طز

دم البعض اتحرق ... طز

المهم هى اسمها كاميليا .. عبير !

يبقى فى 60 الف داهية الكرامة على النخوة على اى حاجة المهم انهم كسلفيين واخوان انبسطوا !!!

كريمة سندي يقول...

كائن من كان لا يجوز انتهاك حرمته وخصوصيته تحت أي ظرف سعدت بموضوعك

;كارولين فاروق يقول...

فكرتني بأحمد فؤاد نجم
واحد اثنين ثلاثه
بلورت بحرفه حال كل فئه
وغرضها بطريقه جميله محبوكه
فهل من مزيد استاذ ابراهيم
اشكرك

زهرة الضحا يقول...

هم يعتبروها أرقاما
ولا يعرفوا قيمتها في حياة أحبابها

يارب يعدي الفترة دي علي خير

عباس ابن فرناس يقول...

عذر اقبح من ذنب ياشيخ ياسر
وياخوفى من اليوم اللى هتدفعو فبه تمن سكوتكم غالى

تحياتى المستعطرة

افكار مبعثرة يقول...

صراحة لا اجد ما اقوله و تحديثك زادني صدمة و اكتئابا
حسبي الله و نعم الوكيل
و حفظك ربي يا بلادي
تحياتي

Bent Men ElZman Da !! يقول...

واضح ان السلفين مش بيدافعوا الا عن اللى زيهم
انما باقى الاتجاهات غير موجودين فى نظرهم نهائى
مالهمش دعوه انهم اصلا بشر


هما مش شايفنا الا ارقام
تعداد فى الاوراق وخلاص
بس احنا كيان
ولما يموت الكيان ده بيفرق اوى مع الناس اللى حواليه
كلمات بتوجع بجد

رؤى عليوة يقول...

وبعد التعديل والتحديث مفيش جديد كل يوم بيثبت كم الغباء اللى عند الناس دى وللأسف ماشيين بإسم الدين وبجد ميعرفوش عنه حاجة وربنا رب قلوب ونوايا مش مناظر

ربنا يرحمنا

الازهرى يقول...

ولسه ياما هنضحك


اصبر حبتين

وكلهم بيبانوا ورا بعض