العذاب شنطة و يونفورم

قالوا فى الامثال قالوا اللى ميسمعش كلام اهله يا ويله و انا اقول اللى ميسمعش كلام زوجته يا ويله
فى رمضان بعد انتهائى من المهمة الصعبة و المستحيلة و هى شراء ملابس العيد فوجئت بطلب غريب اغرب من النعامة ام زلومة من زوجتى بادرتنى و قالت  متيجى نبص على ملابس المدارس قبل الزحام نظرت لها و فى عقل بالى هو فى زحام اكثر من الزحام اللى احنا فيه ده قلت لها بعد العيد نشترى بهدوء و براحتنا نظرت لى نظرة دهشة كنظرة الى مخلوق فضائى هبط على كوكب الارض و سكتت 
انتهى العيد بسلام و انا اؤجل يوم من بعد يوم حتى وعدتهم وعد صادق بالذهاب غدا من الساعة السادسة فوجئت بالانسة ساليناز ترتدى ملابسها و تقول لى مامى بتقول لك قوم البس رديت بكل براءة ليه يا ساليناز ياحبيبتى قالت عشان نشترى الشنط  و اليونفورم بتاع المدرسة قلت امرى لله و انا فى الطريق لمحت زياد يجلس فى الصالة فقلت له يالله يا زياد البس قالى انا مش جاى معاك يا بابى قلت ليه يا زياد قالى انهاردة ماتش برشلونة  و ميلان ياه ده انا كنت ناسى موضوع الماتش ده حاولت اقعد مع زياد عشان اتفرج على الماتش و اتحجج بزياد مامته تقدر على انا اه لكن على زياد لا فقلت لها نأجل المشوار لغدا عشان زياد يأتى معنا و عشان بالمرة اشوف الماتش لكن زياد بادرنى مامى عارفة مقاسى كويس طب و الشنطة يا زياد عشان تختارها اجاب مش مهم يا بابى اى شنطة و لو معجبتنيش ابقى اروح المدرسة بشنطة السنة اللى فاتت ابتسمت و قلت و الله فكرة كويسة ايه رايك لكنها نظرت لى شذرا يعنى تجيب لساليناز شنطة جديدة و زياد لا و لا عشان هو مبيتكلمش زى الاروبة الصغيرة بتاعتك سكت و قمت البس من سكات
قلت ابدء بالشنط فوجئت بارتفاع اسعار الشنط جدا المفاجاة الثانية ان جميع  انواع الشنط صينى او تايوانى احسست فعلا بالغربة اتذكر شكل شنطة المدرسة ايامى كنت تشعر ان الشنطة مصرية تشم رائحة الجلد الطبيعى و القفل المعدن اما اشكال الشنط الان فاغلبها من الاقمشة و الجلود الصناعية و اقفال بلاستك و تشعر انها مصنوعة لاهالى امريكا طبعا الانسة ساليناز غلبتنى فى اختيار شنطتها اعجبتها شنطة عليها رسوم الكارتون الذى تشاهده لكن حجمها كبير اما الحجم المناسب فغير موجود به تلك الرسومات و بعد مناقشات مطولة اقتنعت بشكل اخر اما زياد فطبقا لنظرية المساواة من جانب امه اشترينا له شنطة اغلى قليلا من شنطة ساليناز
ملابس مدارس مصر الجديدة و الزيتون و المطرية يعرف الجميع انه لا يوجد الا محلان بمصر الجديدة و هم محلات فرج و بدراوى لبيع ملابس المدارس  و هو على ما اعتقد بزنس بين المدارس و المحلات  ذهبت الى احدهم و لكنى ظنيت ان المحلات تغيرت و تحولت الى جمعية استهلاكية او شهر عقارى او سجل مدنى  زحام ما بعده زحام و صلنا الى احدى البائعات بعد صعوبة و طلبنا الزى و اخبرناها بالمقاس ثم طلبت حجرة للبروفة نظرت لى نظرة غريبة و قالت حجرة بروفة ايه يا استاذ خد جنب كده و قيس على الملابس و هى لابساها هو فيه وقت كان ناقص تقولى هو ايه دلع الزبائن ده قال حجرة بروفة قال  نظرت حولى وجدت الجميع واخدين جنب و قد كان ان اخذت زوجتى جنب و قاست الملابس و اخيرا تم الانتهاء من الشراء بعد مجهود رهيب و لكنها فرحة ما تمت لان الملابس ينقصها قميص ساليناز لاننا لم نجد المقاس و تريننج زياد و قد وعدتنا البائعة ان غدا سيكونون موجودين تانى رحلة عذاب تانى
بلد مجانين صحيح